BUTUAN CITY: Nadakpan sa mga awtoridad ang usa ka kanhi team leader sa nabungkag nga North Eastern Mindanao Regional Committee sa New People’s Army o NPA, nga nakatala usab isip top 3 most wanted person sa Caraga Region, didto sa lalawigan sa Surigao del Sur niadtong Lunes sa gabi, Agosto 10, 2026.
Giila ni Surigao del Sur Police Provincial Office director Col. Jeffrey Lawrence Mauricio ang suspek nga si alias “Neil” o “Part”, 26-anyos, kanhi lider sa Regional Sentro De Grabidad. Sikop ang suspek sa Barangay San Isidro, Lungsod sa Lianga, pinaagi sa hiniusang pwersa sa Philippine National Police ug Armed Forces of the Philippines nga gipangulohan sa Barobo Municipal Police Station.
Naggikan ang pagdakop sa giisyu nga arrest warrants sa Regional Trial Court Branch 28 sa Lianga batok sa suspek tungod sa tulo ka counts sa murder, duha ka counts sa frustrated murder, sanan usa ka count sa attempted murder. Sa kasamtangan, naa na sa kustodiya sa Barobo Police Station ang suspek alang sa hustong dokumentasyon ug disposisyon, kon diin gihulagway ni Mauricio ang maong pagdakop isip usa ka dakong kadaugan alang sa katarungan ug kapulisang nanalipod sa rehiyon.