TUBOD, Lanao del Norte: Ang Timor-Leste ang mahimong unang langyaw nga delegasyon nga makigbahin ug makigbanggi sa pambukas nga Mindanao Youth Games karong Marso 2027, diin sila lang ang bugtong miyembro sa ASEAN nga gidapit sa maong kalihokan sa Lanao del Norte.
Gikumpirma ang maong pag-apil human sa panagtagbo ni Philippine Sports Commission (PSC) Chairperson John Patrick ‘Pato’ Gregorio ug Timor-Leste Ambassador Marciano Octavio Garcia Da Silva, diin gihisgutan sa duha ka bahin ang pagpalapad sa kooperasyon sa isports, lakip na ang pag-apil sa Timor-Leste sa Mindanao Youth Games ug sa 2027 Tour of Luzon.
Ang lima ka adlaw nga kumpetisyon magtigom sa mga atleta nga nag-edad og 8 hangtod 18 anyos gikan sa Northern Mindanao, Zamboanga Peninsula, Davao Region, SOCCSKSARGEN, Caraga, ug sa Bangsamoro Autonomous Region in Muslim Mindanao. Naghatag kini sa mga batan-ong atleta og oportunidad nga makigbanggi sa lebel sa rehiyon samtang nagpalambo sa pagkahigalaay pinaagi sa isports.
Gipahayag ni Gregorio nga ang pag-apil sa Timor-Leste nagpalapad sa maong kalihokan ug nagpalig-on sa relasyon ug paghiusa sa mga batan-on pinaagi sa isports sa rehiyon.
“This is more than just competition. It is about building bridges, discovering talent, and using sports as a platform for peace and development. Timor-Leste’s participation will enrich the Games and strengthen our ties as ASEAN neighbors,” matud pa ni Gregorio.