Sangguniang Panlungsod nagpahigayon og committee hearing bahin sa reklamo sa Pearl Express sa schedule sa mga van

SURIGAO CITY: Mainit nga gihisgutan ug gidiskutahan sa gihimong committee hearing sa Sangguniang Panlungsod ang reklamo nga gipasaka sa Pearl Express kalabot sa isyu sa queuing o iskedyul sa pagpabiyahe sa ilang mga van sulod sa Surigao Integrated Bus and Jeepney Terminal.

Atol sa maong panagtigom, gipamati sa mga miyembro sa konseho ang mga argumento ug mulo sa maong kompanya ingon man ang habig sa mga hingtungdan nga opisyal sa terminal. Tumong sa maong pagdungog nga mahatagan og patas ug hapsay nga solusyon ang problema sa sistema sa pagbiyahe aron dili maapektuhan ang mga pasahero nga nagsalig sa maong transportasyon matag adlaw.

Gipasalig sa lokal nga panggamhanan nga padayong pangitaan og maayong pamaagi ang maong isyu aron malikayan ang dugang panagbingkil tali sa mga operator sa sakyanan sulod sa terminal.