MAYNILA: Ang gikuwestiyon nga EDSA rehabilitation project, nga gikan sa Orense Street sa Makati City hangtod sa Monumento sa Caloocan City, adunay lain nga kontrata nga nagkantidad og labaw sa ₱1 bilyon, gawas pa sa ₱4 bilyones-plus nga kontrata nga naangkon sa Readycon Trading and Construction alang sa tibuok proyekto sa pag-ayo.
Base sa kontrata, gihatagan ang Readycon og ₱1,183,374,622.61 nga kontrata gikan sa Department of Public Works and Highways (DPWH) ubos sa ilang Asset Preservation Program alang sa preventive maintenance sa mga pangunang karsada subay sa EDSA.
Ang maong proyekto sa EDSA, nga nagpakita og mga guba ug poypoy tungod sa walay hunong nga pag-ulan sa miaging mga adlaw, gipahayag sa una nga mogamit og stone mastic asphalt (SMA). Kini usab usa ka lig-on nga kagamitan sa karsada nga adunay interlocking stone-on-stone skeleton nga ginama sa 70 hangtod 80 porsyento nga coarse aggregate.
Ang mga gintang sa SMA gipuno og sagol nga bitumen, filler, ug stabilizing fibers, nga naghimo sa maong kagamitan nga lig-on batok sa kadaot sa tubig ug sa mga bug-at nga sakyanan.
Gawas niini, gipagawas usab sa DPWH sa una nga ang Phase 2 sa EDSA rehabilitation project nigamit og computer-guided ug laser-assisted nga mga makina sa pag-asphalt, uban sa modernong teknolohiya, aron masiguro ang husto nga pagpatag, mapalig-on ang karsada, ug mas paspasan ang pag-ayo nga gamay ra ang epekto sa mga sumasakay.