CAGAYAN DE ORO CITY: Nagpadayon ang pagkunhod sa inflation rate sa Northern Mindanao hangtod sa katapusan sa Hulyo ning tuiga, sumala sa gipagawas nga taho sa Philippine Statistics Authority o PSA karong Miyerkules.
Sa gipahigayon nga briefing, gipahayag ni PSA Northern Mindanao Director Janith Aves nga miusbos ngadto sa 6.4 porsyento ang inflation rate niadtong Hulyo, nga mas ubos kun itandi sa 7.0 porsyento nga naitala niadtong Hunyo. Gibutyag usab niya nga nagsugod ang pag-usbos sa inflation niadtong Abril diin miabot kini sa 8.2 porsyento, samtang ang Enero gihapon ang nakatala sa pinakaubos nga rate nga nagbarog sa 1.5 porsyento.
Gipatin-aw ni Aves nga ang pagkunhod sa presyo sa pagkaon sanan non-alcoholic beverages ang pangunang nakatabang sa pag-usbos sa inflation sa Hulyo, partikular na ang mga cereal, isda, ug uban pang mga pagkaon sa dagat. Nakatabang usab sa maong pagkunhod ang mga sektor sa transportasyon, pabalay, tubig, kuryente, sanan mga gasolina.