Pila ka indibidwal gidakop, ₱503,825 nga kagamitan sa illegal mining nasakmit sa Barobo, Surigao del Sur

BAROBO, SURIGAO DEL SUR: Pila ka indibidwal ang nadakpan samtang nakatala og ₱503,825 nga balor sa mga kagamitan ug materyales sa pagmina ang nasakmit sa usa ka joint law enforcement operation batok sa illegal mining sa Purok 6, Barangay Guinhalinan, Barobo, Surigao del Sur niadtong Setyembre 3, 2026.

Nangulo sa maong operasyon ang 1301st Maneuver Company sa Regional Mobile Force Battalion 13 (RMFB 13) kauban ang DENR Regional Office 13, Mines and Geosciences Bureau (MGB) Regional Office 13, ug Barobo Municipal Police Station. Nahitabo ang pagpang-aresto ug pagpang-imbargo human nakadawat og report ug impormasyon ang mga awtoridad gikan sa mga concerned citizens bahin sa wala matugoti nga pag-quarry ug pagmina sa dapit nga walay gihuptang permit gikan sa DENR.

Pila sa mga nakumpiska nga kagamitan naglakip sa hammer drills, air blowers, submersible drainage pumps, chainsaws, generators, CCTV equipment, timber, hoses, ug sluice mats. Ang mga gidakop nga suspek gidala sa Barobo Municipal Police Station alang sa pagpasaka og angay nga kaso ubos sa Republic Act No. 7942 o Philippine Mining Act of 1995, samtang ang mga nakumpiskag gamit gidala sa DENR-CENRO Lianga Depository Area alang sa insakto nga kustodiya.