LTO mipahigayon og roadside inspection sa Borromeo Street, Surigao City

SURIGAO CITY: Balik na sa pagpahigayon og roadside inspection ang Land Transportation Office o LTO sa Borromeo Street, sugod gikan sa Kanto Amat hangtod sa atbang sa Surigao del Norte Police Provincial Office Headquarters.

Nagpatuman ang LTO og estrikto nga inspeksyon sa mga sakyanan aron masiguro ang pagsunod sa Republic Act No. 4136 ug uban pang mga balaod nga may kalabutan sa transportasyon sa kadalanan.

Gikinahanglan ang mga motorista nga andamon ang ilang rehistro sa sakyanan, lakip ang Official Receipt o OR ug Certificate of Registration o CR, ingon man ang balido o dili expired nga driver’s license.

Gipahinumdoman usab ang mga drayber nga gidili ang mga dili awtorisado nga pag-ilis o modification sa sakyanan, sama sa paggamit sa blinking lights ug decorative lights nga wala gitugot sa balaod.

Padayon ang panawagan sa LTO sa tanang motorista nga motuman sa mga regulasyon sa trapiko aron malikayan ang paglapas ug ang posibleng multa o penalty.

Alang sa dugang impormasyon sa mga lagda sa trapiko, mahimong bisitahan ang opisyal nga pahina sa Land Transportation Office.