KORONADAL CITY, South Cotabato: Gisugdan hinuon sa Regional Inter-Agency Council Against Trafficking (RIACAT-12) ang pagpahimutang sa IACAT Task Force didto sa General Santos City International Airport.
Ang maong inisyatiba gipahigayon subay sa Resolution No. 1, s. 2026, ug nag-alagad isip proactive nga lakang nga naglinya sa saulog sa 2026 World Day Against Trafficking.
Pinaagi sa tema nga “Iisang Nasyon, Iisang Aksyon: Tapusin ang Human Trafficking Ngayon!,” nagkahiusa ang mga hingtungdan ug mga nasyonal nga ahensya sa gobyerno aron palig-onon ang pamaagi ug hiniusang aksyon batok sa human trafficking.
Sumala sa kunsilyo, ang maong paningkamot nakatutok sa pagpalambo sa pagpugong, pag-ila, ug pagtubag batok sa human trafficking ug illegal recruitment.
Nakanayon sa Anti-Trafficking in Persons Act of 2003 (RA 9208), nga giusab sa RA 10364 ug RA 11862, giila sa resolusyon ang tugpahanan isip usa ka kritikal nga lokasyon alang sa hiniusang paningkamot sa mga ahensya aron makigbatok sa trafficking ug exploitation.
Ang Task Force adunay mando sa paghimo ug pagpatuman og mga estratehiya batok sa trafficking ug illegal recruitment nga alang sa tugpahanan; pagpauswag sa koordinasyon sa mga awtoridad sa tugpahanan, mga ahensya sa pagpatuman sa balaod, imigrasyon, ug mga katuwang nga institusyon; ug pagpahigayon og surveillance, monitoring, ug intelligence sharing.