Ex-DPWH Secretary Singson, gipadayag ang kapin P1.1 trilyon nga CSSP budget nga gigamit sa mga iregular nga proyekto

MANILA: Gipadayag sa kanhi kalihim sa Department of Public Works and Highways o DPWH nga si Rogelio Singson nga adunay laing dakong pondo ang gobyerno nga gitawag og “Convergence and Special Support Program” o CSSP nga miabot sa P1.1 trilyon gikan sa tuig 2022 hangtod 2024.

Sa iyang diskurso sa Philippine Construction Arbitration Conference, gipadayag ni Singson nga ang maong pondo naglakip sa P352 bilyon niadtong 2022, P388 bilyon sa 2023, ug P410.9 bilyon niadtong 2024. Matod niya, ang maong kategorya nahimong dakong agianan sa mga anomalous ug ghost projects nga naglakip sa nagkalain-laing imprastruktura sama sa mga dalan, tulay, flood mitigation ug drainage works, farm-to-market roads, ug mga multipurpose buildings. Gipadayag usab sa kanhi kalihim nga kadaghanan sa inin nga mga proyekto walay gikinahanglan nga technical studies, project unit-cost estimates, ug specifications.

Gawas pa niini, naghatag usab og klaro nga insider account ang iyang pakigpulong kon giunsa paglambo ang dagkong mga anomaliya sa paggasto sa gobyerno sa publikong imprastruktura. Giit ni Singson nga wala lamang kini nagagikan sa mga dishonest nga contractors o fictitious nga mga proyekto sa flood control, kundi lakip na usab sa ginatos ka bilyon ka pesos nga mga proyekto nga gi-insert sa mga lexislador sa nagkalain-laing yugto sa proseso sa pambansang badyet.