Duha ka driver patay sa head-on collision sa duha ka motorsiklo sa Barangay Sabang

SURIGAO CITY: Patay ang duha ka driver samtang naangol usab ang usa ka pasahero human nagbanggaay ang duha ka motorsiklo alas 3:30 sa kadlawon niadtong Agosto 29, 2026, didto sa Purok 2, Barangay Sabang, Surigao City. Sumala sa inisyal nga imbestigasyon sa kapulisan, nagkasugat ug nagbanggaay atubangay ang usa ka Blue Yamaha Mio i 125 nga padulong unta sa San Francisco, Surigao del Norte ug ang usa ka White Honda Beat nga pasingod sa city proper.

Nasayran nga ang driver sa unang motorsiklo usa ka 23-anyos nga taga Barangay Taft ug ang angkas niini usa ka 21-anyos nga babaye nga kolehiyala gikan sa San Francisco, samtang ang driver sa ikaduhang motorsiklo usa usab ka 23-anyos nga estudyante gikan sa Barangay Rizal. Gani, gibutyag sa kapulisan nga walay lisensya ug wala magsul-ob og helmet ang duha ka driver, diin gituohang nakainom usab ang usa kanila sa wala pa nahitabo ang insidente. Tungod sa kakusog sa pagbangga, daling gidala sa QART sa Caraga Regional Hospital ang tulo ka biktima, apan gideklarar nga dead on arrival ang duha ka driver alas 3:43 sa kadlawon sa attending physician.

Kasamtangan nang gidala ang mga patayng lawas sa magkalahi nga punerarya samtang An duha ka motorsiklo anaa na sa kustodiya sa kapulisan. Nagpahinumdom karon ang mga awtoridad sa publiko nga likayan ang pagmaneho kon nakainom og ilimnong makahubog, magsul-ob kanunay og helmet, ug siguruhing kompleto ang mga dokumento ug lisensya sa pag-drive aron malikayan ang ingon niini nga mga katalagman.