DepEd nagpahigayon og National Simultaneous School Safety Drill karong adlawa kauban ang PNP

MANILA: Nagpahigayon ang Department of Education o DepEd og usa ka National Simultaneous School Safety Drill karong adlawa, Setyembre 3, agig tubag sa mga natala nga insidente sa krimen sa pipila ka mga tunghaan. Giklaro sa ahensya nga hugot silang nakigtambayayong sa Philippine National Police o PNP aron hingpit nga masiguro ang kaluwasan, seguridad, ug ang kahimtang sa mental health sa mga tinun-an lakip na sa mga empleyado sa eskwelahan.

Sumala pa kang Education Secretary Sonny Angara, ang maong aktibidad gidesinyo aron palig-onon ang pagpangandam sa mga eskwelahan panahon sa emerhensya nga dili maghatag og wala sa lugar nga kahadlok o kabalaka ngadto sa mga estudyante. Ang pagtakda sa maong drill nahimo pinaagi sa mga seryosong konsultasyon kauban ang mga nagkadaiyang medical ug mental health organizations. Gilangkoban kini sa Philippine Psychiatric Association, Philippine Society for Child and Adolescent Psychiatry, ug Philippine Pediatric Society aron masiguro nga nagsubay ang mga safety protocols sa child-centered ug trauma-informed standards ubos sa “Do No Harm” nga direktiba sa DepEd.

Gidugang usab ni Angara nga ang ilang tumong alang karong adlawa mao ang pagmugna og kalmado nga pagsalig ug pagbansay sa saktong reaksyon panahon sa krisis pinaagi sa husto nga orientasyon, ug dili pinaagi sa pagpanghadlok. Sa wala pa ang mismong aktwal nga drill, gipailawom una ang mga apil nga eskwelahan sa mga capacity-building sessions alang sa mga magtutudlo, readiness assessments, ug haom nga mga orientasyon alang sa tanang mga tinun-an.