BFP personnel ug duha ka minero, patay human ma-trap sa mining hole sa Surigao City

SURIGAO CITY: Tulo ang kinabuhi nga nakalas, lakip na ang usa ka sakop sa Bureau of Fire Protection o BFP, atol sa usa ka trahedya nga nahitabo samtang nagpahigayon og rescue operation sa Sitio Canlabag, Barangay Capalayan, Surigao City niadtong Lunes, Agosto 17, 2026.

Giila ang namatay nga bumbero nga si FO3 Rumar Castro Mahinay, 41 anyos, kinsa mikaon og aksidente samtang misulay pagluwas sa mga minero nga na-trap sa sulod sa usa ka small-scale mining hole. Sumala sa inisyal nga imbestigasyon, niresponde ang BFP alas 11:30 sa buntag kalabot sa report nga na-trap ang duha ka minero nga sila si Romeo Villamor, 58 anyos, ug Jurlic Ferol, 28 anyos. Atol sa operasyon, nabali ang kahoy nga suporta sa lungag nga maoy hinungdan sa pagkahulog pagbalik ni FO3 Mahinay. Bisan pa sa pagdala kaniya sa Caraga Regional Hospital, gideklarar kini nga dead on arrival sa attending physician. Samaran usab ang kauban niining si SFO1 Junril Lafuente Goring human maigo sa mga nangahulog nga kahoy.

Gikumpirmar usab ni Punong Barangay Alicia C. Ozaki nga wala na mabuhi ang duha ka na-trap nga minero nga sila si Villamor ug Ferol. Giklaro usab ni Kapitan Ozaki nga ang dapit sa insidente nahimutang sa Barangay Nabago ug dili sa Barangay Capalayan, ug ang mga biktima mga residente sa Nabago. Padayon pa ang imbestigasyon sa mga otoridad sa pagtino sa hingpit nga detalye sa maong insidente.