SAN JOSE, DINAGAT ISLANDS: Gipahigayon sa PhilHealth Caraga ang usa ka orientation alang sa kapin 100 ka information officers sa Dinagat Islands kaniadtong Hulyo 23 didto sa Provincial Guest Center sa Barangay Cuarinta, San Jose.
Gihangyo ni PhilHealth Reachout Officer Jerome C. Bajao ang mga kapwa info officer nga motabang sa pagpalapnag sa saktong impormasyon kabahin sa mga libre ug napalapdan nga serbisyong panglawas sa gobyerno ilalom sa National Health Insurance Program. Gipasabot ni Bajao nga dako ang tahas sa mga tigbalita sa komunidad sa paghatag og tinuod nga impormasyon taliwala sa pagdaghan sa bakak nga balita sa social media.
Gipresentar usab sa maong tigom ang kalamboan sa mga serbisyo sa PhilHealth gikan sa outpatient packages kaniadtong tuig 2000 hangtod sa paglusad sa Yaman ng Kalusugan Program o YAKAP kaniadtong 2025. Ang maong programa naglakip na karon sa primary care, cancer screening, ug guaranteed medication treatment alang sa tanang miyembro.