MANILA: Nagpadayon ang talagsaong pakigbisog sa Filipino pole vaulter nga si EJ Obiena human niya makuha ang iyang ikapito nga bulawanong medalya sa maong panahon atol sa gipahigayon nga International Stabhochsprung Meeting sa Jockgrim, Germany.
Nailog ni Obiena ang ikaduhang sunod-sunod nga kampeonato human niya nalabyan ang gihabogon nga 5.83 metros, pipila lang ka adlaw human sa iyang kalamposan sa Halberstadter Hohenflug.
Nalabwan sa maong Olympic pole vaulter si Siefeldin Abdelsalam gikan sa Qatar, nga nakalabay usab sa 5.83 metros, pinaagi sa countback. Samtang ang atleta gikan sa Turkey nga si Ersu Sasma maoy nakakuha sa bronse human nakalabay sa 5.77 metros taliwala sa labing maayong 12 ka atleta nga miapil.
Gisulayan usab ni Obiena nga labyan ang height nga 5.93 metros aron matala ang iyang labing maayong puntos sa maong panahon, apan wala kini nagmalampuson.
Gipahayag ni Obiena nga dili sayon ang maong dula ug adunay mga suliran atol sa iyang warm-up ug sa unang bahin sa kompetisyon, apan malipayon gihapon siya sa nakab-ot nga resulta. Gipadayag usab niya nga magpadayon siya sa iyang pagbansay aron mas mangandam pa sa mga mosunod nga kompetisyon.