Mahinay Hall, opisyal nga gin-inagurahan sa BFP Regional Office isip pagpadungog sa namatay nga bayani nga si FO3 Rumar Mahinay

SURIGAO CITY: Pormal nga gipahigayon ang inagurasyon sa bag-ong gipangalan nga “Mahinay Hall” sulod sa Bureau of Fire Protection (BFP) Regional Office, isip usab nga pagkilala ug pagpadungog sa sakripisyo sa namatay nga bayani nga rescuer nga si FO3 Rumar C. Mahinay.

Nangulo sa maong solenn nga programa si BFP Regional Director Chief Supt. Honee Fritz Abangan-Diel, kauban ang mga opisyal ug kawani sa ahensya. Mismo usab nga mitambong ug misaksi sa maong makatandog nga kalihokan ang nabiyuda ni FO3 Mahinay nga si Faith Wilza Mahinay, kauban ang ilang mga anak ug sakop sa pamilya.

Kahinumdoman nga si FO3 Mahinay, sakop sa BFP Special Rescue Force, namatay samtang nagtuman sa iyang pampublikong katungdanan ug nagpahigayon og confined-space rescue and retrieval operation. Ang paghatag sa iyang ngalan sa maong bulwagan nagsilbing walay katapusang paghandom ug pagpasalamat sa iyang gipakitang kaisog, dedikasyon, ug labaw nga sakripisyo alang sa pagserbisyo sa komunidad.