Rider sa motorsiklo naangol human nibangga sa kasugat nga pick-up truck sa Barangay Trinidad

SURIGAO CITY: Usa ka 23-anyos nga drayber sa motorsiklo ang naangol ug dinalian nga gidala sa ospital human nalambigit sa usa ka aksidente sa karsada sa may P1 Bridge, Barangay Trinidad, National Highway, niadtong gabii sa Setyembre 3, 2026, gibana-banang alas 9:30 ang takna.

Base sa gipahigayong imbestigasyon sa mga awtoridad, nalambigit sa maong aksidente ang motorsiklo ug usa ka pick-up truck nga gimanhoan sa usa ka 53-anyos nga drayber. Gituhuan nga ubos sa impluwensya sa ilimnong makahubog ang rider sa motorsiklo samtang nagbiyahe. Sumala sa kapulisan, mi-overtake ang rider sa iyang gisundan nga sakyanan rason nga direktang nibangga sa kasugat nga pick-up truck.

Nakaangkon og kadaot ang duha ka sakyanan ug gidala sa tambalanan ang rider aron matambalan ang mga samad ug bun-og sa iyang lawas. Hinuon, nagkasabot ra usab ang duha ka bahin nga dili na magsang-at og opisyal nga reklamo pinaagi sa usa ka amicable settlement.