SURIGAO CITY: Padayon karon ang gipahigayon nga hugot nga pagrasyon og tubig ngadto sa mga residente sa Purok Kalipayan A ug B, Barangay Washington, Surigao City, agig tubag sa nagkagrabeng krisis sa suplay sa tubig sa dapit. Ang maong inisyatibo gipangunahan sa City Disaster Risk Reduction Management Office o CDRRMO, uban sa pakigtambayayong sa pipila ka mga pribadong kompanya sa dakbayan. Tumong niining maong lakang nga daling maayudahan ang mga apektadong pamilya ug masiguro nga duna silay igong magamit alang sa ilang inadlaw-adlaw nga panginahanglan.
Kining maong krisis sa tubig usa ka direktang epekto sa padayon nga nasinati nga El Niño phenomenon sa nasud. Kahinumdoman nga bag-ohay lamang nagpagawas og pasidaan ang PAGASA nga moabot sa 44 degrees Celsius ang heat index sa dakbayan hangtod karong adlawa, Setyembre 3. Ang padayon nga pagrasyon sa Barangay Washington kabahin sa mas lapad nga aksyon sa lokal nga pangagamhanan aron batokan ang hulga sa huwaw, susama sa gihimong pag-abli sa non-potable water filling station didto sa Barangay San Juan aron matabangan ang mga lugar nga nakasinati na og pagkauga sa ilang mga gripo.
Dugang pasakit alang sa mga apektadong residente kining kakulangon sa tubig hilabi na karon nga pormal usab nga nagdeklara ang CDRRMO og Haze Alert sa tibuok siyudad. Tungod sa nagkatap nga aso ug polusyon nga nagikan sa forest fires sa Indonesia, hugot nga giawhag ang publiko nga magpabilin sa sulod sa balay ug kanunay mag-inom og tubig aron maprotektahan ang ilang panglawas. Nanawagan pag-usab ang mga otoridad sa hiniusang kooperasyon sa tanan pinaagi sa pagdaginot sa tubig aron makalahutay ang tibuok komunidad sa dungan nga hagit sa grabeng kainit ug nagkagrabe nga polusyon sa hangin.
Leave a Reply