Panaglalis bahin sa Bibliya miresulta sa pagpamusil sa Butuan City; usa samdan

BUTUAN CITY: Usa ka init nga panaglalis kalabot sa managlahing pagtuo sa Bibliya ang nisangpot sa pagpamusil nga gikasamad sa usa ka lalaki atol sa ilang pag-inom sa Barangay Kinamlutan, Butuan City, sayo sa buntag niadtong Miyerkules, Setyembre 2, 2026.

Nahitabo ang insidente mga alas 2:40 sa kadlawon sa Purok 1. Sumala sa inisyal nga imbestigasyon sa Butuan City Police Office Station 3 o BCPOS 3, nag-inom ang biktima nga giilang si alyas “Dondon” ug ang iyang kauban nga suspetsado nga si alyas “Narciso” sa dihang nagkalalis sila kalabot sa ilang mga pagtuo. Misamot kakusog ang tensyon tungod kay pulos na ubos sa impluwensya sa ilimnong makahubog ang duha. Dugang sa taho sa kapulisan, kalit nga mibunot og pusil si Dondon ug nag-akma nga pusilon si Narciso. Apan dali kining nailog sa suspek ug mao na hinuon ang nakapusil sa biktima.

Nakaangkon og mga pinusilan si Dondon ug daling gidala sa tambalanan alang sa medikal nga pagtagad. Human sa panghitabo, boluntaryong misurender si Narciso sa kapulisan ug giturn-over ang armas nga iyang nailog, nga usa ka .22-caliber revolver nga adunay upat ka mga bala. Matud pa sa suspek, igo lang siyang nidepensa sa iyang kaugalingon (self-defense). Kasamtangan na siyang anaa sa kustodiya sa kapulisan samtang padayon ang gihimong imbestigasyon aron pagtino sa kamatuoran ug aron pag-andam sa posibleng kasong ipasaka batok kaniya.