Mag-amang Matugas girekomendahan og kasong graft ug malversation sa buhatan sa Ombudsman

SURIGAO DEL NORTE: Nagpagawas og rekomendasyon ang Office of the Ombudsman alang sa tag-duha ka ihap sa kasong graft ug malversation batok kang Surigao del Norte District I Representative Francisco “Lalo” Matugas ug sa iyang anak nga si kanhi congressman Francisco Jose “Bingo” Matugas II. Lakip usab sa mga narekomendahan nga pasakaan og kaso mao ang pipila ka mga opisyal sa Department of Public Works and Highways o DPWH ug pipila ka indibidwal gikan sa Boometrix Development Corporation.

Atol sa usa ka press conference, pormal nga gipahibalo ni Assistant Ombudsman Mico Clavano ang maong lakang nga adunay kalabotan sa gitawag nga ₱80.61 milyones nga infrastructure project didto sa lungsod sa Del Carmen, Surigao del Norte.

Dali usab nga nagpagawas og pamahayag si kanhi congressman Bingo Matugas pinaagi sa iyang social media aron tubagon ang maong isyu. Sumala pa kaniya, wala pa siya nakadawat og opisyal nga kopya sa reklamo apan gipaniguro niya nga iyang tubagon ang tanang alegasyon subay sa saktong proseso sa balaod ug isumite ang mga kompletong dokumento sa higayon nga tugotan na kini sa korte. Gihangyo usab niya ang publiko ug ang iyang mga tigpaluyo nga dili makiglalis sa social media agig pagtahod sa proseso sa husgado. Nangayo siyag pasaylo sa kahasol ug misaad nga atubangon niya ang sitwasyon sa saktong legal nga pamaagi.