𝗠𝗼𝘀𝘁 𝘄𝗮𝗻𝘁𝗲𝗱 𝘀𝗮 𝗦𝘂𝗿𝗶𝗴𝗮𝗼 𝗱𝗲𝗹 𝗦𝘂𝗿, 𝗻𝗮𝘀𝗶𝗸𝗼𝗽 𝘀𝗮 𝗕𝘂𝗸𝗶𝗱𝗻𝗼𝗻

CAGAYAN DE ORO CITY: Nasikop sa mga personahe sa kapulisan sa Bukidnon ang 27-anyos nga mag-uuma nga giila isip labing gipangita o most wanted person sa Surigao del Sur niadtong Miyerkules sa gabii.

Gidakop sa hiniusang pwersa sa kapulisan si Juniel Cainday Dequit mga alas 6:30 sa gabii didto sa Sitio Madasigun, Barangay Kawayan, sa lungsod sa Quezon.

Si Dequit, nga lumulupyo sa lungsod sa San Miguel sa Surigao del Sur, duha ka tuig na nga nagtago-tago sa mga otoridad.

Gihimo ang operasyon sa Quezon Municipal Police Station (MPS), 2nd Provincial Mobile Force Company, Bukidnon Provincial Intelligence Unit, ug sa Bukidnon Police Provincial Office uban ang tabang sa mga personahe gikan sa San Miguel MPS ubos sa Surigao del Sur Police Provincial Office.

Matud ni Lt. Col. Erwin Naelga, ang hepe sa Quezon MPS, nga si Dequit nasikop pinasukad sa warrant of arrest nga gipetsahan og Enero 24, 2025, tungod sa kasong rape, diin walay girekomendar nga piyansa.