Bag-ong water filling station gibuksan sa San Juan aron matabangan ang mga apektado sa El Niño

SURIGAO CITY: Nagtinabangay ang City Government of Surigao ug ang Surigao Metropolitan Water District sa pagplastar og usa ka water filling station duol sa San Juan Material Recovery Facility sa Purok 12, Barangay San Juan. Usa kini ka electric-supported nga deepwell nga gitukod aron pandugang sa kasamtangang supply sa tubig samtang nagpadayon ang mga lakang batok sa epekto sa El Niño, diin prayoridad niini ang mga pamilyang nakasinati og hinay o walay agas sa ilang mga panimalay.

Gipahinumdoman hinuon sa mga awtoridad ang publiko nga ang tubig gikan sa maong tinubdan kay non-potable o dili luwas imnon, ug gihangyo ang tanan nga magdaginot ug dili mag-hoard aron mapaambitan ang uban.