14-anyos nga taga-Caraga mihakot og upat ka medalya sa internasyonal nga kompetisyon sa Thailand

CARAGA: Nagbilin og dakong garbo sa Pilipinas ang 14-anyos nga si Appollo Mar “Tobey” Macarine human siya mihakot og duha ka bulawan ug duha ka plata nga medalya sa 3rd AOSI SC Swimming Championships Bangkok 2026 didto sa Assumption University Aquatics Center. Isip representante sa nasud ug sa Philippine Aquatics Caraga niadtong Agosto 29 hangtod 30, nasakmit sa batan-ong atleta ang gold medals sa 50-meter ug 25-meter Breaststroke, lakip na ang silver medals sa 100-meter ug 200-meter Breaststroke nga mga kategorya.

Ang maong kampeon usa ka mapasigarbuhon nga Grade 9 nga tinun-an sa Caraga Regional Science High School. Nahimong posible kining dakong kalampusan pinaagi sa pagbansay sa iyang coach nga si Mico Anota, ug ang hugot nga suporta sa iyang mga ginikanan nga sila Mr. Marlon ug Mrs. Iris Mae Macarine. Gipaabot usab ang dakong pasalamat sa mga indibidwal nga nagpaluyo sa iyang biyahe lakip na sila Sen. Bong Go, PSC Chairman Pato Gregorio, PAI Sec. Gen. Eric Buhain, ug PAI Caraga Pres. Dick Victor Carmona tungod sa ilang tabang aron mahatagan og dungog ang natad sa isports sa tibuok kalibutan.