LAS NIEVES: Nasikop ang usa ka 39-anyos nga Barangay Health Worker o BHW atol sa usa ka buy-bust operation nga gilusad batok sa giingong ilegal nga pagbaligya og krudo ug gasolina didto sa Barangay Casiklan, Las Nieves, Agusan del Norte.
Giila sa kapulisan ang suspek pinaagi sa alyas nga “Rona,” residente ra usab sa maong barangay, kinsa nadakop sa mga awtoridad niadtong miaging Domingo. Nakuha atol sa operasyon ang kapin 280 ka litro sa mga produkto sa petrolyo nga gibaligya matod pa sa suspek nga walay saktong permit ug awtoridad gikan sa ahensya sa gobyerno.
Gihingusgan sa kapulisan ang maong operasyon aron mapugngan ang dili awtorisado nga pagpayuhot ug pagbaligya sa petrolyo nga mahimong magdala og kakuyaw sa kaluwasan sa publiko.
Kasamtangan nga gibutang sa kustodiya sa Las Nieves Municipal Police Station o MPS ang suspek samtang giandam ang tukmang kaso kalapasan sa Presidential Decree No. 1865 nga nag-amenda sa Batas Pambansa Blg. 33 tungod sa ilegal nga pagbaligya sa petrolyo.
Alang sa dugang impormasyon sa mga balaod ug operasyon sa kapulisan, mahimong bisitahan ang opisyal nga pahina sa Philippine National Police.
Leave a Reply