Mga nagbaligya og powder detergent nga namugos ug nangayo og ID gipahimangnoan

SURIGAO CITY: Gipasidan-an sa mga lokal nga awtoridad ang publiko human ang usa ka residente nagpadayag sa iyang kabalaka mahitungod sa mga indibidwal nga nagbaligya og powder detergent nga giingong namugos sa pagbaligya ug nangayo pa og personal identification sa mga motorista.

Base sa sumbong nga nadawat, magpahimutang ang maong mga mamaligyaay sa mga dapit nga dili kaayo daghan og mga balay. Ilang pahunungon ang mga moagi nga sakyanan pinaagi sa pagpakita sa ilang gidala nga detergent. Kung mohunong ang motorista, mangayo sila og ID o lisensya aron tan-awon ang apelyido. Human niini, pilit nilang sultihan ang drayber nga paryente sila o “lumon” aron pugson kini nga mopalit sa ilang produkto. Bisan pa sa pagpangutana sa barangay kaniadto, nagpadayon gihapon ang ilang operasyon sa pagpangita og mga dapit aron mamaligya sa maong pamaagi.

Tungod niini, gipahimangnoan ang mga motorista ug ang tibuok publiko nga magmatngon ug dili basta-basta maghatag og ID o personal nga impormasyon sa mga dili nailhang tawo. Gihangyo usab ang katawhan nga direktang ireport sa barangay o kapulisan ang insidente kung adunay mahitabo nga pagpanghadlok, pagpamugos, o kadudahang pagpangayo og dokumento sa kadalanan. Alang sa dugang impormasyon sa mga pahimangno sa kahapsay ug kalinaw, mahimong bisitahan ang opisyal nga pahina sa Philippine National Police.

Photo from RPN DXKS Surigao by NRC