P96 matag adlaw: Gikuwestiyon ang pamaagi sa gobyerno sa pagkalkula sa poverty threshold

MANILA: Bisan pa sa pahayag sa gobyerno nga mius-os sa rekord nga 9.7 porsiyento ang kapobrehon sa nasud niadtong 2025, nagpabiling pangutana kung pila ba gyud ang kinahanglan sa usa ka Pilipino aron mabuhi.

Base sa datos sa Philippine Statistics Authority o PSA, ang poverty threshold anaa sa P35,121 matag tawo sa usa ka tuig, nga nagpasabot nga anaa lang sa P2,927 matag bulan o P96 matag adlaw ang gitagana sa matag indibidwal. Samtang alang sa usa ka pamilya nga adunay lima ka miyembro, ang threshold moabot sa gibana-bana nga P14,634 matag bulan o kapin kon kulang P488 matag adlaw.

Apan gikwestiyon kung ang P96 matag adlaw igo ba gyud aron makapuyo sa disente nga kinabuhi, tungod kay kini ang banabana sa PSA aron matuman ang gitawag nga minimum basic food and non-food requirements. Naggikan ang problema sa paagi sa pagkalkula niini, diin ang bahin sa pagkaon gibase sa low-cost food bundle ug giagi sa least-cost test aron pangitaon ang labing barato nga kombinasyon sa lokal nga pagkaon. Alang sa mga pamilyang nanlimbasug sa presyo sa palaliton, ang least-cost dili kanunay nagpasabot nga igo o sustansyado, samtang ang non-food component nagdala usab og mas dakong kabalaka.