SURIGAO CITY: Naghiusa ang nagkalain-laing Rotary Clubs sa Area 3G kauban ang ilang mga dedikadong Rotaractors aron sa pagpahigayon sa usa ka hiniusang Community Blood Donation Drive didto sa San Juan Basketball Gym, Barangay San Juan, Surigao City niadtong Agosto 23, 2026.
Gisugdan ang maong humanitarian event sa alas-8:00 sa buntag diin gihugpaan kini sa mga Rotarians ug mga kabataang lider aron pagtubag sa padayon nga panginahanglan sa luwas nga suplay sa dugo sa lokal nga sektor sa panglawas. Nagpakita usab sa ilang panaghiusa ang mga miyembro pinaagi sa pagsul-ob og “End Polio” shirts ug “Create Lasting Impact” caps.
Ang maong kalihokan gipangunahan ni Assistant Governor Rizal Bodie Crispino, kinsa mihatag sa iyang pagdayeg sa hiniusang paningkamot sa mga club sa pag-organisar sa venue ug sa pagdasig sa mga lumulupyo sa pagdonar. Padayon usab nga nagmadasigon ang mga boluntaryo ug lokal nga donor sa pagsuporta sa maong kawsa aron makatabang sa pagluwas og mga kinabuhi. Ang mga naglangkob sa Rotary Clubs of Area 3G naglakip sa RC Surigao City, RC Metro Surigao, RC Surigao Midtown Jewels, RC Central Surigao, RC Central Siargao, ug RC Metro Dinagat.
Leave a Reply