MAYNILA: Nagpagawas si Presidente Ferdinand Marcos Jr. og Administrative Order No. 43 nga nag-mando sa tanang ahensya sa gobyerno sa paghatag og kadali ug pag-atiman sa boluntaryong pagkuha (deduction) ug pagbayad sa social protection contributions alang sa mga contract of service (COS) ug job order (JO) workers.
Ang maong AO No. 43, nga gipirmahan niadtong Hunyo 3, 2026, nagatugot sa automatic ug sakto sa oras nga pagremit sa mga bayronon sa Social Security System (SSS), Philippine Health Insurance Corp. (PhilHealth), ug Pag-IBIG Fund alang sa mga contractual nga kawani sa gobyerno. Sa wala pa gipagawas ang maong mando, ang mga COS ug JO workers kinahanglan pang personal nga moadto ug magbayad sa ilang kaugalingong voluntary contributions sa maong mga ahensya.
Sumala sa maong order, gipahimangnoan ang mga ahensya nga ipahigayon ang maong pamaagi basta adunay pagtugot (prior consent) gikan sa mismong kawani, ug uyon sa mga probisyon sa Republic Act Nos. 11199, 11223, ug 9679.
Gisakop sa Administrative Order ang tanang departamento, ahensya, bureau, ug opisina sa nasyonal nga kagamhanan, lakip na ang Government-Owned or -Controlled Corporations (GOCCs) ug State Universities and Colleges (SUCs). Giawhag usab ang mga lokal nga kagamhanan (LGUs) nga mosunod ug mopatuman sa maong pamaagi.
Gipatin-aw usab sa AO No. 43 nga ang pag-atiman sa maong voluntary deduction ug pagremit dili mag-usab o magbag-o sa kasamtangang kontrata ug relasyon tali sa kagamhanan ug sa mga COS ug JO workers. Aron masiguro ang hapsay nga pagpatuman, gigiyahan ang Department of Budget and Management (DBM), Civil Service Commission (CSC), Commission on Audit (COA), SSS, PhilHealth, ug Pag-IBIG Fund sa paghimo og mga opisyal nga patakaran ug rules alang niini.