BUTUAN CITY: Girol-out sa Department of Social Welfare and Development o DSWD ang ilang Unified Package for Livelihoods, Industry, Food, and Transport o UPLIFT Assistance sa 63 ka mga lokal nga kagamhanan sa Caraga Region aron tabangan ang mga pamilyang nag-atubang sa kahimtang sa ekonomiya.
Gipahayag ni Michael John Andohuyan, ang UPLIFT team leader sa Agusan del Norte, nga ang maong programa gipahigayon sugod Hulyo hangtod Disyembre ning tuiga. Tumong niini nga matabangan ang mga kabus ug duol sa kakabos nga naapektuhan sa krisis ug sa pagtaas sa presyo sa lana ug enerhiya tungod sa mga giyera ug geopolitical conflicts sa Middle East.
Hangtod niadtong Agosto 11, 2026, miabot na sa 59,700 ka mga pamilya ang nakadawat sa maong hinabang nga nagkantidad og 119.4 million pesos sa tibuok rehiyon. Gibutyag usab nga ang mga benepisyaryo gipili pinaagi sa Community-Based Monitoring System o CBMS sa PSA, kon diin nagreserba ang DSWD og pondo nga kapin sa 1.3 billion pesos alang sa kinatibuk-ang target nga 107,730 ka mga benepisyaryo sa Caraga.