CARMEN, SURIGAO DEL SUR: Pormal nga gisupak ug gisalikway sa lokal nga kagamhanan sa Carmen, Surigao del Sur ang bisan unsang aktibidad sa pagmina sa ilang lungsod tungod sa gikahadlokang hulga niini sa mga watershed, agrikultura, kalikopan, ug sa tibuok komunidad.
Gipangunahan mismo ni Mayor Nestor Valeroso ang maong baruganan atol sa usa ka multisectoral forum nga gitambongan sa mga residente, lider sa simbahan, mga mag-uuma, mangingisda, sanan mga katutubo. Gihisgutan sa panagtigom ang grabeng kabalaka batok sa mga nagpadayong aplikasyon sa mining exploration nga sakop sa ilang lungsod.
Gipahayag sa manifesto nga gipagawas sa lokal nga pangagamhanan nga ang Carmen usa ka lugar nga nagsalig sa agrikultura, kon diin ang kinabuhi sa mga tawo nagabase sa pag-uma sanan sa malungtarong paggamit sa kinaiyahan.
Dugang pa sa manifesto, ang ilang mga umahan, panginabuhian, ug kasiguruhan sa pagkaon nagasalig gyud sa walay hunong nga suplay sa limpyo nga tubig gikan sa ilang mga watershed, suba, tubod, ug communal irrigation systems nga maoy naghatag og kinabuhi sa tibuok lungsod.