55 anyos nga lalaki, gipusil patay sa wala pa mailhing mga suspetsado samtang natulog sa iyang balay sa Malimono

MALIMONO, SURIGAO DEL NORTE: Patay ang usa ka 55 anyos nga lalaki human kini gipusil samtang natulog sa sala sa iyang balay sa Purok 2, Barangay Pili, Malimono, Surigao del Norte, niadtong Domingo sa gabii, Agosto 16, 2026, mga alas 10:00 sa gabii.

Giila ang biktima nga si Jeffrey Amoncio Paronia, 55 anyos, minyo, usa ka welder, ug residente sa maong dapit. Sumala sa inisyal nga imbestigasyon sa Malimono Municipal Police Station, kalit nga misulod sa iyang balay ang duha ka tawo nga wala pa mailhi ug gipusil ang biktima sa ulo gamit ang gitahong kalibre .45 nga armas nga misangpot sa iyang hinanaling kamatayon, una dali nga misibat ang mga suspek padulong sa wala pa mahibaw-i nga direksyon.

Padayon pa ang kapulisan sa Malimono sa ilang gihimong follow-up operation aron mailhan ang mga suspek ug mahibaw-an ang motibo sa maong pagpamusil.