CAGAYAN DE ORO CITY: Human sa 34 ka tuig, gi-amoma pag-usab sa dakbayan sa Cagayan de Oro ang pinakadakong tigom sa mga lider sa negosyo, investors, ug policy decision makers pinaagi sa pagpahigayon sa 35th Mindanao Business Conference o MinBizCon.
Dala ang temang “Accelerating Inclusive Growth for Business Through Innovation and Sustainability”, gipakita sa maong komperensya ang dakong kalamboan sa rehiyon, ilabina ang ekonomiya sa Northern Mindanao o Region 10 nga miabot na sa 1.095 trillion pesos niadtong 2025 sumala sa Philippine Statistics Authority.
Gipahayag ni Philippine Chamber of Commerce and Industry o PCCI President Ferdinand Ferrer nga dili na lamang basta usa ka “promising region” ang Mindanao, kon dili usa na kini ka lig-on nga nga prayoridad nga sentro sa negosyo ug pamatigayon sa tibuok nasud. Gidugang usab niya nga ang maong tinuig nga tigom nga gipangulohan sa Cagayan de Oro Chamber of Commerce and Industry nagpakita sa kaandamon sa rehiyon alang sa mas malungtaron ug inklusibong kalamboan.